灣景國際 The Harbourview 嘅灣景廳，一直係港島區自助餐嘅翹楚，近日推出兩個全新主題自助晚餐，分別係「啟航尋味」海洋盛饌自助晚餐（即日至2026年3月31日）同「東瀛旬味祭自助晚餐」（2026年4月1日至6月30日）。編輯部親身試食後，認為呢兩個主題無論係食材選用、烹調手法，以至整體用餐體驗，都體現到酒店對餐飲質素嘅堅持同創意，值得向大家推薦。

先講「啟航尋味」海洋盛饌自助晚餐。呢個主題以「環遊世界尋味啟航」為概念，將餐廳打造成一艘美食郵輪，帶領食客展開一趟環球海洋味覺旅程。入到餐廳，已經感受到一股航海氛圍，裝飾細節充滿海洋元素，令人放鬆心情準備出發。重點推介嘅「船長荷葉竹籠蒸海鮮」，係一道充滿儀式感嘅菜式。竹籠上枱時熱騰騰，裡面有果皮蒸鮑魚、蒜香蒸扇貝、清蒸海蝦同花雕松葉蟹鉗茶碗蒸。果皮嘅清香滲入鮑魚，鮮味突出；蒜香扇貝肉質嫩滑；海蝦爽甜；而茶碗蒸嘅花雕酒香同蟹鉗鮮味融為一體，絕對係一場味覺嘅啟航儀式。另一道必試嘅「獅城經典辣子蟹」，用上新鮮肉蟹，以濃郁番茄同辣椒醬炒至入味，醬汁掛滿蟹身，食落鹹香帶微甜，香氣撲鼻，完全體現新加坡國民料理嘅精粹。而「鹽焗蟶子」則以原始粗鹽高溫焗製，保留蟶子天然海水鹹鮮，淋上蒜油蔥花，食落鮮甜多汁，係「原味海洋」嘅最佳演繹。